عملت حسبة الفطور والغدا، حسبة اكتفاء ذاتي من راس عقلي لكن منطقية. على الأقل نموذج حسبة. أو أول خطوة بالحسبة.
الفطور والغدا مع بعض شي ١٦٠٠ سعرة حرارية بروتين عالي وقليل الدهون بيكون ممتاز. فطور شوفان مع حليب وموز ولوز والغدا صدر جاج مشوي مع خضرا.
الفطور شهري بكلف: ٥١ دولار والغدا ١٣٩ دولار، حسب أسعار القدس اللي هي غالية نسبيًا.
يعني مع بعض ١٩٠ دولار بالشهر..نضيف ١٠٪ إضافة بهارات وزوائد وشوي فواكه ع خضرا وهيك، يعني ٢١٠ دولار بالشهر، فهيك صار ٢٥٢٠ دولار بالسنة.
يعني الواحد ممكن ياكل أكل صحي ومفيد وكافي ب ٢٥٢٠ دولار بالسنة يعني ٢١٠ دولار بالشهر…
فرضنا الواحد زرع أي خضرا أو فواكه بالبيت مثلًا، وافترضنا إنه يعني بالمعدل أي محصول ممكن يكون سعره بين ال ١ أو ٢ دولار للكيلو..معناته لازم ينتج ١٠٠ إلى ٢٠٠ كيلو من أي محصول عشان يبيعهم ويعيش.
هاي كمية شجرة كلمنتينا واحدة بدارنا جابتهم العام.
فإنت متخيلة قديش ممكن الناس ما تحتاج تعتمد لا على حكومة ولا على رؤوس الأموال ولا مؤسسات؟
إذا بنربي دجاج محتاج تدبح ١٨٠ جاجة بالسنة للغدا. وإذا زارع فواكه من أي نوع. محتاج بالسنة ٩٠ كيلو فواكه لوجبة الفطور. وإذا بدك تأمني الشوفان لطول السنة محتاجة ٤٥ كيلو. يعني محتاجة تزرعي ربع دنم أرض شوفان..وهيك بتحتجش تشتري شوفان.
هاي الثلاث شغلات بتمثل ١٨١٩ دولار من المصروف اللي فوق. يعني شي ٧٠٪ من المصروف.
فإذا بتربي جاج (محتاج شي ٣٠ – ٤٠ متر ل ٢٠ جاجة) وبتزرع ربع دونم شوفان وشجرة شجرتين فواكه. بتصير بس تحتاج بالسنة تقريبًا ٧٠١ دولار ..بالشهر ٦٠ دولار على أكلك
يعني إذا عندك مساحة دونم بيكون عندك بيت وبتعمل بير وبتزرع شوفان وخضرا وفواكه وبتربي جاج . وبتحتاج أكل بالشهر ٦٠ دولار بالكثير…يعني محتاج تبيع ٦٠ كيلو من حصادك بالشهر. وكل شي بتنتجه فوق هيك بتحوشه.
ضيفي لكل هاد لو بتربي معزاية .المعزاية بتجيبلك لترين ونص (إحكي لترين حليب كل يوم) . يعني إذا بتربي معزاية بتحتاجيش تشتري حليب لأنه بتنتجلك ٤ أضعاف حاجتك اليومية. يعني بينزل احتياجك المالي ل ٤٨ دولار بالشهر بدل ٦٠، وبيزيد ربحك لو بعتي الحليب ٥٠ دولار شهري على الأقل. يعني بيغطي كل احتياجك المالي بدون حاجة تبيعي خضرا وفواكه. زائد إنه المعزاية بتجيب سخلة كل سنة ..فانتاج لحمة
ممكن ما تبيعي الحليب وتعملي منتجات ألبان جبنة وبلبنة ولبن.
البقرة بتنتج ١٠ أضعاف الحليب اللي بتنتجه المعزاية..يعني شي ٢٥ لتر باليوم …يعني شي أكثر من ٥٠٠ لتر بالشهر الواحد ممكن يبيعهم غير استخدام البيت ..يعني هدول شغل٧٠٠ دولار بالشهر….
فأه مربحة..بس البقرة تربيتها مش بسهولة المعزاية…
بتقدر تكون مكتفي ذاتيًا لو بتعتمد على الزراعة وتربية حيوانات بمساحة صغير مش كبيرة.
هاي كلها حسبة تقريبية ومن طرف راسي، وفي مصروف لتجهيز المشروع وفي معرفة محتاجيتها ولكن كل هاد بيدخل ضمن نطاق أهم خطوة بكل هالموضوع، هو خطوة التخطيط الجيد وأخذ احتماليات كثير بعين الاعتمار للمعلومات غير اليقينية، ولكن هاد بكل شي بالحياة، وهو صحيح غير يقيني ولكن ممكن يتم التعامل معه بطريقة علمية، حسب قناعتي بما إني بمجال أبحاث عن تحليل البيانات غير اليقينية.
وفوق هاد، هاد شغل فيهوش تحكي بدي آخد إجازة. لهيك وللأسباب أعلاه، نجاح أسلوب الحياة الزراعي بيعتمدش فقط على التخطيط الجيد، لكن بيعتمد على عمل جماعي، هو أسلوب حياة جماعية، وهاي الجماعية بتساعدك تلاقي مساحتك الفردية ضمن هالمجتمع لأنه في حد يشيل عنك وباتضل العجلة ماشية.
طبعًا عقبة السلطات سواء استعمارية أو قمعية الخ ممكن تلعب دور بافشال أي نمط حياة اجتماعية اقتصادية مشابهة، ولكن هذا هو نفسه صراعنا للحرية، حرية تحديد نمط حياتنا، وحرية تحديد مجرى حياتنا. البداية هي أصعب شي ولكن بعدها بتكرج وبيصير الانتاج نمط حياة والاكتفاء الذاتي نمط حياة والحرية نمط حياة.
أفكار فلسطيني 