- قاعدة بحلل سلوك الناس مع التلج انه مش معقولين شو عندهم امل! وبتمسخر مش اكتر
** اشتقتلك 🙂
- قد ما الناس مشتاقة للتلج ؟
ما قلتلي قديش نسبة صح من اللي حكيت انه بعرفه عنك
يعني قديش بعرفك ؟
** ما هاد رأيك..شو بدريني بينفعش أنا احكم
- اه اوك يعني مش كتير بعرفك
بس انا بعرفك
** شو عم بتعملي؟
- بشتاقلك
** انا منكد مش عارف ليش…صدري عليه صخرة!
- اوككككي هلئ فهمت انا ليش فايقة مخنوقة ومش جاي عبالي افيق
** انسيك مني..ليش فايقة مخنوقة؟
- مش عارفة …هاي الحياة مش كافية روحي دايما ناقصها اشي
** قلبي ثقيل..وحاسس بغصة بحلقي..محتاج اكون بفلسطين..ومش بس اكون بفلسطين..اكون موجود بفلسطين بنفس السياق اللي كنت فيه واكثر…مش مبسوط هون..واه كل شي نظريا ماشي تمام بحياتي..بس مش هاي الشغلات اللي بدي اياها..فاقد اهتمام بكل شي..ما في شي اله معنى بالحياة ..ومش حاسس انه عن جد حدا فاهم علي! …مش قادر حدا يفهمني ومخنوق..وخلاص بس حكي عشان دموعي هيها نزلت
- بتقدر ترجع لهاد السياق بتقدددر…
ما تحزن …الحزن مش رح يصلح اشي … بتقدر تلاقي طريق انه ترجع لهاد السياق … بس اصبر شوي الاشياء بدها وقت لترجع تمشي
** شايفة كمان انت بتحكيلي بتقدر وانه اصبر وبتطبطبي علي وبتواسيني..ما بينفع هاد..انا مش متفرج مستني اشوف نهاية سعيدة لفيلم بالسينما..
بتعرفي ليش اخدني وقت طويل اتجاوز اللي صار؟ شي حكيتيلي اياه مرة بأيلول..انه احنا بنرسم صور مثالية للناس وبتصير مقياس حكمنا..
وانا فعلًا ما كنت بدي اتخلى عن الصورة المثالية. إذا حسيت بكرة انه تصرفها كان مؤذي…اذا حاولت افهم تصرفها وسببه وأوصفه..الوصف رح يكون مؤذي لصورتها المثالية..فكان أسهل إني ألوم نفسي ع كثير شغلات..وألاقيلها أعذار…كنت بكل جدالاتنا أقلها معك حق آسف..مش عشان عنجد مقتنع إنه معها حق..بس عشان لو معهاش حق..معناته لازم أقرر كيف أوصف الحكي اللي حكته أو التصرف اللي اتصرفته..
مش إنه كنت رح اغير شي..أنا كنت متحيز إلها وما كان رح يتغير هالشي..فكنت بوقتها مش رح أتصرف بطريقة غير..حتى لو فاهم كل هالحكي..
بنضلنا دايمًا على أمل..عشان شو إحنا بدون امل..
- بعرفش قديش مهم تسأل شو هاي الصورة المثالية وقديش حقيقية … بس قديش خطير أصلا إنه نرسم صور مثالية تحبسنا فيها على رغم مثلا إنه نكون عم ننئذي… هاي الصور المثالية بتخلينا نبطل عارفين نشوف الأشياء صح… بصير لازم نعزل هاي الصورة شوي وننتبه للي بصير
أفكار فلسطيني 