كنت بحضر هاي المقابلة وتذكرتك بعرفش ليش.
حلوة وبتوجع..بس يصرلك وقت شوفها.
حضرت وسمعت..بحبوش بلك..بحبش القناة..ولكن حاسس بالقهر اللي بيعبر عنه..حاسس بمشاعر كثير عبّر عنها..ومشاعر ما عبّر عنها بس حسيتها وهو ما بيعبر عنها
بجوز إذا بتفقش معه بشي عبر عنه لما بيحكي إنه “الإم بتحب ابنها حتى لو مشوه”. أنا بشفش فلسطين مشوهة، بشوفها حلوة وكثير حلوة كمان. بس بجوز لأنه بنشوفها بعيون مختلفة . هاد بس وحل عليها بنغسله وبيمشي الحال.
بتعرفي شو أصعب شي بس نطلع من الوطن؟ إنه بنطلع وبتضل روحنا فيها. بره البلاد كل سعاداتنا وأحزاننا وانتصاراتنا وانتكاساتنا منقوصة، بنقدرش نعيشها كاملة. بتحس إنها كلها تسليكة. يعني حتى لما تكون عم بتعيش لحظات سعيدة ، بيمرقش شوي وإلا مخك بيقلك وقف! وين شاطح؟! اتذكر إنك مش بالبلاد..اتذكر إنك مقصر بهالحياة كثير طالما إنك مش معطي الوطن كل شي..بتصير تحس بالذنب على كل ضحكة وكل ابتسامة وكل حضن بره البلاد.
بحسد الناس اللي وطنهم هم الناس اللي بيحبوهم. فممكن يروحوا كندا، لو الناس اللي بيحبوهم غاد ..فخلاص بيحسوا إنهم بوطنهم..بس باعرفش قديش بتقدر تركن على الناس..الناس بتتغير ..الوطن بيتغيرش. باعرف إنه حد رح يحكيلي..ما هو يا فلان شو الوطن؟! الوطن مش حجر..الوطن ناس. صبابة فاهم ..بس الوطن برضه حجر وشجر وجبل وهوا…وهوا ..الهوا غير..بحب البرد..بس البرد ببلادنا..البرد ببلادنا غير.
كيف يوم تشوف صبية حلوة مثلًا..إنه عيونها حلوين..بس كثير ناس عيونهم حلوين…ابتسامتها حلوة ..ملان ابتسامات حلوة…حتى إنت شايف ابتسامات أحلى …الخ الخ..بس هي بكل هالشغلات مجتمعة…هو المزيج المثالي. وبهالمزيج هالعيون بتشوفهم أحلى عيون وبدك اتضل تبحّر فيهم ليل نهار…بهالمزيج أحلى ابتسامة هالابتسامة، وبدك اتضل تبتسملها عشان تبتسملك حتى لو عضلات وجهك تعبوا! بيصير أي نواقص بهالشخص اللي بتحبه، بسياق هالمزيج المثالي تشوفه حلو وتحبه…هيك الوطن…
أمّا عن الناس…والله لو الناس اتغيرت..بالنسبة لالي بيبطلوا جزء من هالوطن..الوطن أه بناسه…بس مش بفلان وعلتان…لااا، الناس اللي شكلها من شكل الوطن..روحها من روح الوطن…ناس طيبة ناس كادحة…ناس بتغلط بس بتقلك حقك على راسي اطلب..ناس ممكن تجرح..بس لما تجرحك بتحطلك هي المرهم ..مش بتدشرك وبتمشي ..الناس اللي بتحلم وبتسهر وكلها حنين وشجن…والشجن هون مش بمعنى الحزن زي ما الكل بيستخدمه..الشجن هي هديك الأفكار اللي بتحرك عواطفك..هي الأغصان اللي بتشتبك مع أحلامك وبتكبر معها وبتكبّرها..
أه موجودين الناس..اللي هم جزء من الوطن واللي بيخلينا نحب الوطن…موجودين بالوطن، أو بره الوطن بينتظروا العودة للوطن…بس ما حد يأشرلي على الزبايل ويحكيلي هاي ناسك شو هالوطن!
الوطن عندي بينتقلش من مكان لمكان..الوطن الثابت الوحيد بالحياة..حتى الناس اللي بلحظات بتفكر إنه علاقتك فيهم هي من الثوابت بالحياة..بيثبتولك إنه لأ..بيتشكلوا مع وين بتاخدهم الريح…وبعدين بيعتبروا تغيرهم هاد نضوج. بنحب نعطي أوصاف لكل شي عشان نلاقي تبريرات لكل شي غلط بحياتنا…
وعشان هيك بحب الوطن..لأنه ثابت..لأنه باقدر أركن إنه دايمًا موجود مكانه…دايمًا باقدر اركن إنه رح تكون في لحظة الغروب اللي بحبها…لو الدنيا ركام..باقدر اقعد على انقاضها واشرب قهوتي وأنا مستمتع بلحظة الغروب هذيك…ما في أجمل من إنه تغرب عليك بالوطن..لحظة السكينة والسعادة الأبدية…وما في اتعس من إنه تشرق عليك وإنت بالشتات..لحظات مستمرة من التخبّط والقهر!
أفكار فلسطيني 